البلــــــوج...

أول رد فعل جالي لما قلت اسم البلوج لحد كان.. نعـــم!!

بصراحة اتصدمت لأني تعبت في اختيار الاسم ده.. وكنت عايزة اختار اسم يعبر عن اللي جوايا..

وقبل ما أكتب أي بوست على البلوج قررت أكتب البوست ده عن اسم البلوج والبلوج نفسه..

المهم مش هطوّل عليكوا وهقولكوا أنا ليه اخترت اسم "شخابيط راقصة" ده ..Dancing Doodles

اخترت الاسم ده لأني حسيت إني محتاجة أخرج كل الأفكار اللي بتدور في عقلي واللي أنا باتخيلها شخابيط كتير بترقص في عقلي.. أحياناً شخابيطي بتكون رقصتها فرحانة قوي وأوقات تانية بتكون الرقصة حزينة.. المهم إنها مابتتهدّش فقررت أحطها على المسرح وأشوف الرقصة على الورقة أو على البلوج يعني..

مش هاوعدكوا إن كل الشخابيط هاتعجبكوا لكن هاوعد نفسي إني أعبّر عنها بحرية وأقول اللي بفكر فيه حتى لو في جملة واحدة..

إنت/ي كمان ممكن تكتب وتجسّم شخابيطك اللي بترقص في عقلك وقلبك.. الكتابة بتساعدنا نعبّر عن نفسنا.. بتورينا نفسنا أكتر وتفهمنا أفكارنا.. أوقات لما تكتب ممكن تحس إن الورقة شايلة معاك الهمّ وبتخففه عنك.. ممكن كلماتك تشجع حد أو تكون سبب في تشجيع حد ليك.. اكتب يمكن تلاقي فكرة تكون بداية لحلم جواك أو تطوير ليه.. فاكتب وعبّر عنك.. اكتب لنفسك مش للقراء.. اكتب وقول اللي في نفسك.. اكتب وماتحرمش الرقصة اللي في عقلك وقلبك من الظهور على خشبة المسرح "الــــورقة" :) :)

** ملحوظة: أنـــا مش بلوجرز :P