الأيام اللي فاتت عدّى قدامي على فيسبوك وتويتر مقال تحذيري من الزوج المصري وبنات كتير تداولته على اقتناع تام بمحتواه، والحقيقة ما اهتمّتش أقراه في البداية لغاية ما صديقة ليَّ بعتتهولي كنوع من الهزار، فقُلت آه ده جايلي أنا بقى! فقريته وقُلت لصديقتي أنا عايزة أتجوز واحد يتفرج ويضحك معايا على المسرحيات اللي بأحبها :D
الحقيقة المقال خّلاني أفكّر في كذا جانب للموضوع...
الجانب الأول - الخبرة الشخصية:
في كل مرة بأقرا/أسمع جُمل زي: "كل الستات المصريات نكديات" أو "كل الرجالة المصريين مابيتحملوش المسؤولية" بأندهش جداً إن فيه حد قابل (كل) الستات أو (كل) الرجالة فقدر يخرج بمقولة زي دي واختصر كل النوع في جملة! التعميم ظالم! على المستوى الشخصي قابلت أزواج وزوجات كتير، من جيلنا والجيل الأكبر مننا، وفيه منهم اللي جوازهم ناجح واللي بيحاولوا يشتغلوا على إنجاحه وقابلت محبطين من جوازاتهم، وأعتقد الأنواع دي موجودة في أي مجتمع وأي ثقافة مش بس المصرية... قابلت أزواج وزوجات قدّ المسؤولية وممتنة إني دخلت بيوت سعيدة بجد، مش زي ما ناس كتير بتردد إن الجواز = غمّ... وقابلت أزواج كتير بيدفعوا زوجاتهم للأفضل ولتحقيق أهدافهم وطموحاتهم ويشاركوهم الحلم كمان... مش بس افتكرت أصحابي من المتجوزين، لكن فكَّرت كمان في أبويا وأمي وبيتنا اللي ممتنة ومتباركة إني اتوجدت في الحياة فيه، واللي اتعلّمت فيه إن فيه حاجة اسمها عيلة سعيدة وإني ينفع يكون عندي عيلة وبيت زي بيت أهلي!
الجانب التاني - طب وأنا!
زمان وأنا صغيرة أول حاجة اتعلمتها عن الارتباط إني قبل ما أسعى للارتباط بالشخص الصالح أكون أنا الشخص الصالح... علشان كده في رأيي إن قبل ما ألوم الآخر علشان مش قدّ المسؤولية أو غير مبالي أو نكدي أو غيره، محتاجة أفكَّر فيَّ أنا وفي صفاتي ومميزاتي وعيوبي والحاجات اللي محتاجة أشتغل عليها... محتاجة أراجع اختياراتي، يمكن أنا اللي بأختار نوعية معينة من الشخصيات وده اللي بيحبطني ويوهمني إن (ما كل الرجالة كده)... محتاجة أسأل نفسي هل أنا شخص صالح علشان شخص صالح تاني يتمنى يرتبط بيَّ ويكبر ويعجّز جنبي وتحلاله صُحبتي؟!
محتاجة أسأل نفسي: إنتي الولييِة؟! :)
الجانب التالت - وال (مش) مصري!
في رأيي أنا بأرتبط بالشخص علشان (هو مين) مش علشان (مش زي مين)، فحتى لو فكَّرت في يوم من الأيام أرتبط بغير مصري فمش هايكون السبب إنه علشان (مش مصري) لكن علشان (هو هو) علشان اقتنعت بيه وحبيته هو كشخص، هو بعيوبه ومميزاته، هو بإحباطاته ونجاحاته، بصراعاته وانتصاراته.. هأرتبط بيه علشان هو ده بعينه اللي أنا عايزاه وعايزة أكون سند ليه وشايفة فيه أب صالح لولادي وده اللي حابّة أعجِّز في السن معاه.
وأعتقد لو اختياري للأجنبي ده كان بس لأنه مش مصري، يبقى بأهينه وبأظلمه لأني ماشفتش هو مين وعميت عيني عن اكتشافه هو شخصياً، لأن كل اللي بأفكر فيه هو الهروب من صورة معينة في بالي مش أكتر!
وأخيراً بأسأل نفسي، لو اتجوزت ال (مش) مصري هايفهمني ويضحك معايا لما أقول له: كلنا هانبور بسببك يا فوزية أو قُل لها إنتي الولييِة؟! :)
