كل سنة وإنت في الشارع

ملحوظة قبل قراءة البوست: البوست ده كتبته من سنة وشهر وكان بالأساس موجه لأصدقائي المسيحيين، وطبعاً مُرَحَب بإخواتي المسلمين وجميع القراء من أي خلفيات دينية أو فكرية :) لكن القصد إن حتى بعد مرور أكتر من سنة على كتابته إلا إني لسه شايفة إننا محتاجين نسمع ونقول نفس الكلمات دي تاني علشان كده قررت إعادة نشره.. أتمنى تستمتعوا بقرايته وتفيدوني بآرائكم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دم... حلم... خوف... أمل...
مصاب... انتماء... سلاح... كرامة
سجين... حرية... قصاص... وطن
شهيد... عَدل... أهله مستنيين جثته توصل
مش مهم أنا... مشرحة... يا رب

الكلمات دي من أكتر الكلمات اللي ابتديت أسمعها من بداية ثورة 25 يناير 2011. مش عارفة وإنت بتقرا الكلمات دي حسيت بلخبطة في مشاعرك وللا لأ.. على أي حال، هو ده كان الحال..

الناس في بلدنا مرِّت بتخبط رهيب في مشاعرها وأفكارها في الوقت اللي فات.. الشوارع كانت في حالة ارتباك.. أنا مش هاتكلم عن السياسة، لكن هاكلمك عن الشــــارع... هاكلمك عن شوارع كان فيها حزن وكانت محتاجة لمسة أمل وحد يطبطب على ناسها.. حد يبتسم في وشها.. حد يزور مساجينها المحبوسين ظلم، أو حتى يبعتلهم تلغراف يقول لهم: إنتوا مش لوحدكم.. أو حد يحضن أم وهي رايحة تدفن ابنها.. حد يزور مصاب فقد عينه أو اتصاب بالشلل مدى الحياة، ويقول له: إنت بطل.. حد يروح لطفل نايم على الأرصفة ويحضنه ويجيبله حاجة حلوة.. الشارع كان محتاج حد يقول له: ماتخافش، ربنا موجود.. الشارع كان محتاج بصيص أمل.. الشارع كان محتاج يسوع... الشارع كان محتاجك إنت تجيبله يسوع..

في البوست ده باتكلم عن ناس قرروا يكون ليهم دور، قرروا ينزلوا الشارع، أو يستضيفوا الشارع في بيوتهم، ناس قرروا يخرجوا برة شلِّتهم، و برة الأفكار المُسلَّم بيها اللي اتربوا عليها، قرروا يخرجوا برة كنايسهم، قرروا يعوموا ضد التيار، قرروا يسيبوا دايرة الراحة بتاعتهم... قرروا يكونوا شهود لإلههم.. قرروا يساعدوا يسوع.. يساعدوه؟!! أيوة.. يسوع قال: "لأَنِّي جُعْتُ فَأَطْعَمْتُمُونِي. عَطِشْتُ فَسَقَيْتُمُونِي. كُنْتُ غَرِيبًا فَآوَيْتُمُونِي. عُرْيَانًا فَكَسَوْتُمُونِي. مَرِيضًا فَزُرْتُمُونِي. مَحْبُوسًا فَأَتَيْتُمْ إِلَيَّ.... الْحَقَّ أَقُولُ لَكُمْ: بِمَا أَنَّكُمْ فَعَلْتُمُوهُ بِأَحَدِ إِخْوَتِي هؤُلاَءِ الأَصَاغِرِ، فَبِي فَعَلْتُمْ.." متى 25: 35،36،40 وإنت بتعمل الحاجات دي، إنت بتعملها ليسوع نفسه.. كل واحد من الناس دي هو يسوع نفسه.. تخيَّل؟!

عشان كده بادعوك تنزل وتقابل يسوع في الشارع.. تنزل وتاخد يسوع للناس في الشارع.. وساعتها بس هاتلاقيه بيقول لنا: "تَعَالَوْا يَا مُبَارَكِي أَبِي، رِثُوا الْمَلَكُوتَ الْمُعَدَّ لَكُمْ مُنْذُ تَأْسِيسِ الْعَالَمِ. "
                                                                                         متى 25: 34

بمناسبة ذكرى ثورة 25 يناير.. أحب أقولك من كل قلبي:

"كـــــــل سنـــــة وإنــــــت في الشـــــــارع"